Germaniyada jamoat transporti xodimlari yirik ish tashlash amalga oshirishadi

Germaniyada jamoat transporti sektori xodimlari 48 soatlik ish tashlash e’lon qildilar. Norozilik aksiyasi 27-28 fevral kunlari bo‘lib o‘tadi.

Davlat sektori xodimlarining "Verdi" kasaba uyushmasi tomonidan e’lon qilingan umummilliy ish tashlash 100 dan ortiq kompaniya tomonidan boshqariladigan avtobus, tramvay va shahar atrofi poyezdlari faoliyatiga ta’sir ko‘rsatishi kutilmoqda.

Aksiyada Berlin va Gamburg kabi yirik shaharlarda ishlovchilarni o‘z ichiga olgan taxminan 100 ming xodim ishtirok etishi rejalashtirilgan.

Ushbu ish tashlash orqali kasaba uyushmasi transport sektorida yaxshiroq mehnat sharoitlari va yuqoriroq ish haqi talab qilmoqda. Talablar qatoriga haftalik ish soatlarini qisqartirish, dam olish muddatlarini uzaytirish, shuningdek, tungi va dam olish kunlaridagi ishlar uchun yuqoriroq bonuslar berish kiritilgan.