Fransiya Ruminiyaning so‘roviga binoan Qora dengizning g‘arbiy qismida kuzatuv olib borish va muhim infratuzilma ob’ektlarini himoya qilish maqsadida Atlantique 2 dengiz razvedka samolyotini yubordi.
Bu haqda Ruminiya Mudofaa vazirligi matbuot xizmati ma’lum qilgan.
Vazirlik ma’lumotlariga ko‘ra, Fransiya harbiy-dengiz kuchlariga tegishli samolyot mamlakat janubi-sharqida joylashgan Mixail Kogelnichanu nomidagi 57-havo bazasiga joylashtirilgan.
Razvedka parvozlari 18 oktyabrdan 6 noyabrgacha bo‘lgan davrga rejalashtirilgan. Missiya davomida samolyot Qora dengizning g‘arbiy qismida kuzatuv va razvedka ishlarini amalga oshiradi.
«Fransiya harbiy-dengiz kuchlari razvedka samolyoti parvozlarining maqsadi — dengiz qatnovi uchun mavjud tahdidlarni aniqlash va Ruminiyaning istisno iqtisodiy zonasida muhim infratuzilma ob’ektlari himoyasini kuchaytirishdan iborat», — deyiladi xabarda.
Ruminiya Mudofaa vazirligi aniqlik kiritishicha, parvozlar «Vise-admiral Ioan Jorjesku» harbiy-dengiz bo‘linmasi qo‘mondonligi ko‘magida, Dengizda qutqaruv ishlarini muvofiqlashtirish markazi bilan hamkorlikda rejalashtiriladi va muvofiqlashtiriladi.
Sun’iy intellekt dunyodagi eng qimmat surat muallifligini shubha ostiga qo‘ydi
O‘zbekiston Samarqand haqidagi bayonotlar sabab Eronga norozilik notasi topshirdi
Dunyodagi eng yirik yo‘lovchi samolyoti Moskvaga qo‘na olmayapti — OAV
