Buyuk Britaniya va OBSEga a’zo yana 23 davlat Gruziya bo‘yicha missiya boshlashni taklif qildi

Buyuk Britaniya va OBSEga a’zo yana 23 davlat Gruziyaga inson huquqlari sohasidagi vaziyatni baholash uchun ekspertlik missiyasini yuborish tashabbusi bilan chiqdi. Bu haqda Gruziyadagi Report byurosi xabar berdi.

Ma’lum qilinishicha, tegishli qo‘shma bayonot Buyuk Britaniya hukumatining rasmiy saytida e’lon qilingan. Hujjat Gruziyaning OBSE oldidagi majburiyatlari qanday bajarilayotganini o‘rganish maqsadida missiya tashkil etilishini nazarda tutadi.

Bayonotni Albaniya, Avstriya, Belgiya, Bosniya va Gersegovina, Kanada, Chexiya, Daniya, Estoniya, Finlyandiya, Germaniya, Irlandiya, Islandiya, Latviya, Lixtenshteyn, Litva, Lyuksemburg, Moldova, Chernogoriya, Niderlandiya, Norvegiya, Sloveniya, Ukraina, Shvesiya va Buyuk Britaniya imzolagan.

Missiya so‘nggi paytlarda inson huquqlari va asosiy erkinliklar sohasida ro‘y bergan voqealarni hujjatlashtirish, ularning fuqarolik jamiyati, OAV erkinligi, sud hokimiyati mustaqilligi, siyosiy plyuralizm va qonun ustuvorligiga ta’sirini baholash, shuningdek, vaziyatni yaxshilash bo‘yicha tavsiyalar ishlab chiqish bilan shug‘ullanadi.

Bayonotda ta’kidlanishicha, Gruziya OBSEga a’zo davlat sifatida inson huquqlari va asosiy erkinliklarni himoya qilish bo‘yicha majburiyatlar olgan. Biroq mamlakatdagi so‘nggi voqealar ushbu majburiyatlar bajarilayotganiga jiddiy shubhalar uyg‘otmoqda. Xususan, 2024 yil 28 oktyabrda Gruziya parlamenti tomonidan yetakchi muxolifat partiyalari faoliyatini taqiqlash jarayoni boshlangani, shuningdek, muxolifatning to‘qqiz nafar yetakchisiga nisbatan ayblovlar qo‘yilgani tanqidga sabab bo‘lgan.

Bayonotni imzolagan davlatlar Gruziya hukumatini missiya bilan hamkorlik qilishga chaqirgan. Shu bilan birga, Rossiyaning Abxaziya va Janubiy Osetiyadagi davom etayotgan harbiy huzuri tufayli missiya faoliyati faqat Gruziya hukumati nazoratidagi hududlar bilan cheklanishi qayd etilgan.