Buxoroda fuqaroni pichoqlab o‘ldirgan ko‘zi ojiz ayolga sud hukmi o‘qildi

Asli Buxoro shahrida tug‘ilgan va bugungi kunda Kogon shahrida yashab kelayotgan 68 yoshli ikkinchi guruh nogironi U.O.ning xatti-harakati yuzasidan e’lon qilingan sud hukmi ayolning mahalladoshlarini ancha tashvishlantirdi. Buxoro viloyati sudi axborot xizmati rahbari Feruz Sharopovning «Xabar.uz»ga bildirishicha, fuqaro U.O.ga nisbatan joriy yilning 14 avgustida Jinoyat ishlari bo‘yicha Kogon shahar sudi hukmi bilan O‘zbekiston Respublikasi Jinoyat kodeksi 97-moddasiga asosan (qasddan odam o‘ldirish) 5 yil ozodlikdan maxrum qilish jazosi tayinlangan.

Sud hujjatlariga ko‘ra, ko‘rish imkoniyati nolga teng U.O. faqatgina yorug‘likni oq rang sifatida ko‘ra oladi. Biror qarindoshi bo‘lmagani bois, uyda bir o‘zi yashab kelgan. Qo‘shnilari bilan yaxshi munosabatda bo‘lgan, ular ayolning holidan xabar olib turishgan.

Joriy yilning iyun oyida U.O.ning qo‘shnisi uyini ta’mirlatish uchun rus millatiga mansub M.M. ismli ustani chaqirgan. U.O. ustaga qo‘shnisining uylari ta’mirini yakunlagach, o‘zining ham uyi devorlarini suvoqlab berishini iltimos qilgan.

Oradan bir necha kun o‘tgach, usta fuqaro U.O.ning yashash xonadoniga kelib ta’mirlashni boshlagan. Yarim kundan ham kam vaqt ichida usta U.O.ning devorlarini suvoqlab xizmat haqini olgan. Uy egasiga suv ichishiga, ovqatlanishiga ko‘maklashgan. Ustadan mehr ko‘rgan U.O. u bilan do‘st tutingan. Kunora chaqirib, suhbatda bo‘lgan. Usta keksa ojiza ayolning nafaqa pulini olib kelishiga ham ko‘maklashgan. Yaxshi odamlar ko‘pligidan mamnun bo‘lgan ayol ustani do‘st sifatida yaqin ko‘rib, olgan nafaqasidan unga ziyofat berishini bildirgan. Biroq, ayol ustaning do‘kondan oziq-ovqatlar mahsulotlariga qo‘shib, spirtli ichimlik – aroq ham olganidan xabari bo‘lmagan. Uyga qaytgach, oshxonada ovqat pishirishayotgan M.M.ning nega aroq olganini va nega ichayotganini so‘ragan. M.M. esa aroq ichayotganini tan olmagan, U.O. esa aroq borligini va uni quyib ichayotganini hididan sezganini aytgan. Ayolning qayta-qayta ogohlantirishiga qaramay, M.M. tinimsiz ichgan va keksa ojizani ham ichishga majburlashga urinib, unga hatto shilqimlik qila boshlagan.

Biroq, fahshdan yiroq, spirtli ichimlik iste’mol qilmaydigan, jismoniy nuqsoni borligi tufayli turmushga ham chiqmagan ojiza g‘azablangan: kartoshka archayotgan qo‘lidagi oshxona pichog‘i bilan unga qarshilik ko‘rsatgan. Mast erkak tanasining istalgan joyiga: chap son qismiga va ko‘krak qafasiga pastdan yuqoriga qarab, pichoq urib, uni qasddan o‘ldirgan.

Sud majlisida sudlanuvchi tariqasida so‘roq qilingan U.O. e’lon qilingan aybiga iqrorlik bildirgan. Sudda ishtirok etgan marhumning o‘g‘li R.M. esa otasi doimiy ravishda spirtli ichimliklar iste’mol qilib kelishi, aybdorga nisbatan da’vosi yo‘qligini va unga nisbatan qonuniy yengillik so‘rab, ko‘rsatuv bergan.

Sud hay’ati U.O.ga jazo tayinlashda uning yoshini, ayolligini, kasalmand va ikkinchi guruh nogironi ekanligini, muqaddam sudlanmaganligini, jabrlanuvchining unga nisbatan da’vosi yo‘qligini inobatga olgan.