Armanistondagi fermerlar pomidor savdosi bilan bog‘liq muammolar tufayli avtomagistralni to‘sib qo‘yishdi

Armanistonda fermerlar pomidor savdosi bilan bog‘liq muammolar tufayli Yerevan-Erasx avtomagistralini to‘sib qo‘yishdi.

Bu haqda mahalliy News.am agentligi xabar berdi.

Xabarga ko‘ra, namoyishchilar meva-sabzavot savdosi bilan bog‘liq muammoga yechim topishni talab qilmoqdalar. Namoyishchilar polisiya talablariga qaramay, mashinalarini yo‘lga qo‘yishdi va yo‘lni tozalashdan bosh tortishdi.

Namoyishchilardan birining so‘zlariga ko‘ra, rasmiylar har yili hosil savdosi bilan bog‘liq muammoni hal qilishga va’da berishmoqda, ammo vaziyat yanada yomonlashmoqda. Fermerlarning ta’kidlashicha, ularning mahsulotlari ichki bozor uchun mo‘ljallangan bo‘lsa-da, eksportdagi qiyinchiliklar ichki savdoga ham salbiy ta’sir ko‘rsatmoqda.

Fermerlar kreditlarni kechiktirishni yoki hosilni sotib olish bilan bog‘liq muammoga yechim topishni talab qilmoqdalar. Aks holda, ular norozilik namoyishlarini kuchaytirish bilan tahdid qilishdi.