AQShda bir kunda uch kishi qatl etildi

Shu bilan birga, Kaliforniya yuzlab o‘lim hukmlarini umrbod qamoq jazosiga almashtirishga qaror qildi.

AQShda 5 noyabr kuni Florida, Alabama va Indiana shtatlarida qotillik uchun hukm qilingan uch nafar mahkum bir vaqtning o‘zida qatl etildi. Ularning barchasiga o‘lim in’eksiyasi yuborilgan. Bu 2026 yilning avgust oyidan beri kuzatilgan ikkinchi shunday holat bo‘ldi, vaholanki, ilgari uchta shtatda bir kunda qatl ijro etilishi 2010 yildan beri qayd etilmagan edi.

Floridada 2004 yilda 75 yoshli ayolni o‘ldirish va tunashda aybdor deb topilgan 64 yoshli Djessi Guardado qatl etildi. O‘limidan oldin u jabrlanuvchining yaqinlari va o‘z oilasidan kechirim so‘radi.

Alabamada 1991 yilda keksa er-xotinni o‘ldirgan 54 yoshli Maykl Teylorga nisbatan hukm ijro etildi. Indianada esa 2010 yilda uyga o‘t qo‘yish vaqtida ikki bolaning o‘limida aybdor deb topilgan 50 yoshli Djeffri Vaysxayt qatl qilindi. Yil boshidan beri AQShda jami 35 kishi qatl etilgan bo‘lsa, shulardan 19 tasi Florida shtati hissasiga to‘g‘ri keladi.

Bir vaqtning o‘zida Kaliforniya gubernatori Gevin Nyusom 548 nafar mahkumning o‘lim hukmini shartli ozod qilinish huquqisiz umrbod qamoq jazosiga almashtirish niyatida ekanini e’lon qildi. Uning so‘zlariga ko‘ra, «davlat tomonidan ma’qullangan qotilliklar» shtat qadriyatlariga zid keladi. Kaliforniyada qariyb 20 yildan beri qatllar o‘tkazilmagan, 2019 yildan beri esa ularni ijro etishga rasmiy moratoriy amal qilmoqda.