10–11 noyabr kunlari o‘tkazilgan uchrashuv fevral oyidan buyon uch davlat vakillarining ilk uch tomonlama muzokarasi bo‘ldi. Ikkinchi kungi muloqot ikki soatga yaqin davom etgan.
Muzokaralar yakunida Rossiya delegasiyasi rahbari Vladimir Medinskiy matbuot anjumani o‘tkazdi. Uning so‘zlariga ko‘ra, tomonlar o‘z pozisiyalarini bildirgan, ayrim masalalarda o‘zaro tushunishga erishilgan, boshqalarida esa kelishmovchiliklar saqlanib qolgan.
«Biz yangi keng ko‘lamli asirlar almashinuvi bo‘yicha prinsipial kelishuvga erishdik. Uning aniq shartlari yaqin vaqt ichida e’lon qilinadi», – dedi Medinskiy.
Uning ta’kidlashicha, muzokaralarning markaziy mavzusi Yevropa xavfsizlik tizimi bo‘lgan. Rossiya delegasiyasi rahbari muloqotlar davom ettirilishini ham bildirdi.
Shuningdek, AQSh prezidentining maxsus vakillari Stiv Uitkoff va Jared Kushner 12 noyabr kuni Moskvaga borishi ma’lum bo‘ldi. Kushnerning ma’lum qilishicha, ular Rossiyaga tashrifdan so‘ng Dublinda Ukraina prezidenti Vladimir Zelenskiy bilan uchrashadi.
Hozircha Ukraina tomoni muzokaralar natijalari va asirlar almashinuviga oid kelishuv yuzasidan rasmiy bayonot bermagan.