Abbosbek Fayzullayev: «Eron ustidan g‘alaba qozonmoqchimiz»

O‘zbekiston milliy terma jamoasi bugungi mashg‘ulotlarini boshladi. Abbosbek Fayzullayev jurnalistlarning savollariga javob berib o‘tdi.

"Jamoaning kayfiyati a’lo darajada. Albatta, g‘alabadan keyin hammamiz xursandmiz. Lekin ko‘p xursand bo‘lish uchun vaqtimiz yo‘q. Chunki, 3 kundan keyin Eronga qarshi o‘yin kutib turibdi. Bu bahsga yaxshi tayyorgarlik ko‘rishimiz kerak. Eronga qarshi uchrashuv qiyin kechadi. Buni bilib turibmiz. Oldimizga maqsad qo‘yganmiz, keyingi o‘yinda ham g‘alaba qozonmoqchimiz.

Bunday o‘yinlarda qaysi jamoa imkoniyatlardan foydalansa, o‘sha yutadi. Bizda imkoniyat bo‘ladi baribir. Imkoniyatlardan foydalansak, g‘alaba qozonamiz.

Hozir ajratib ko‘rsatiladigan o‘yin yo‘q. Chunki, har bir bahs 3 ochko beradi. Har bir uchrashuvda maksimal konsentrasiya bilan o‘ynash kerak va vazifani bajarish kerak", — dedi Fayzullayev.