O‘zbekiston va Serbiya o‘rtasida ikki tomonlama hamkorlikni mustahkamlashga qaratilgan hujjatlar imzolandi

Toshkentda O‘zbekiston Prezidenti Shavkat Mirziyoyev va Serbiya Prezidenti Aleksandr Vuchich o‘rtasida muzokaralar bo‘lib o‘tdi va uning yakunida tomonlar Qo‘shma deklarasiyani imzoladi.

O‘zbekiston prezidenti matbuot xizmati xabar berishicha, davlat rahbarlari ishtirokida ikki davlat o‘rtasidagi hamkorlikning turli yo‘nalishlarini qamrab oluvchi hukumatlararo va idoralararo keng ko‘lamli hujjatlarni imzolash marosimi bo‘lib o‘tdi.

Imzolangan shartnomalar sarmoyalarni o‘zaro rag‘batlantirish va himoya qilish, iqtisodiyot, tibbiyot, turizm, ta’lim, fan va madaniyat sohalarida hamkorlikka oid hujjatlarni o‘z ichiga oladi.

Mashinasozlik, ilg‘or texnologiyalar va sun’iy intellekt sohasidagi hamkorlikni rivojlantirishga alohida e’tibor qaratildi. Shuningdek, diplomatik tayyorgarlik, sport va jismoniy tarbiya sohalarida hamkorlik to‘g‘risidagi protokollar, mehnat migrasiyasi sohasida hamkorlik to‘g‘risidagi memorandum imzolandi.

Shuningdek, Toshkent va Belgrad shaharlari o‘rtasida hamkorlikni yo‘lga qo‘yish to‘g‘risida shartnoma imzolandi.