Трамп Россия-Украина урушини 24 соат ичида тугатиш ваъдасини "киноя" деб атади

АҚШ президенти журналист Шерил Эткиссонга интервю бериб, Россия-Украина урушини якунлаш бўйича музокараларни изоҳлади.

"Ҳозирча барчаси яхши кетмоқда. 17 март куни оташкесим бўйича кўпроқ маълумотларни билиб оламиз, умид қиламанки, ҳаммаси яхши бўлади", — дея фикр билдирди президент.

Эткиссон Трампдан сўнгги пайтларда Владимир Путин билан мулоқот қилган-қилмаганини сўради. "Мен буни айтишни хоҳламайман, лекин биз у билан ишлаганмиз ва менимча, ҳаммаси етарлича яхши кетмоқда. Бу жуда мураккаб вазият. Биласизми, бу қонли ва даҳшатли уруш, аммо сулҳ бўйича музокаралар жараёни олдинга силжимоқда", — дея жавоб берди у.

Россия-Украина урушининг мураккаблиги ҳақидаги сўзлардан сўнг журналист Трампга сайловолди кампанияси давридаги баёнотларини эслатди. Ўшанда у бир неча бор Қўшма Штатлар президенти этиб сайланган тақдирда урушни 24 соат ичида якунлашини айтган эди.

"Ўшанда мен буни бироз киноя билан айтгандим. Мен ҳақиқатан ҳам Украина урушига барҳам беришни хоҳлайман. Буни уддалайман деб умид қиламан", — дея таъкидлади берди Трамп.