Трамп Россияга қарши санкцияларга «яшил чироқ» ёқди

9 июль 2025 йил — АҚШ Сенатида Россияга қарши кенг қамровли санкциялар тўғрисидаги қонун лойиҳаси олға силжиб бормоқда. Лойиҳа муаллифи, республикачи сенатор Линдси Грэм маълум қилишича, президент Дональд Трамп энди ушбу ташаббусни қўллаб-қувватламоқда.
«У вақт келганини айтди. Биз ҳаракатга ўтдик», — деди Грэм.

Лойиҳа аввал кечиктириб келинаётган бўлса-да, шу ойда Сенатда овозга қўйилиши мумкин. Грэм ва демократ сенатор Ричард Блюменталь томонидан қонунга тузатиш киритилиб, президентга Россия нефти ва уранини харид қилаётган мамлакатларга қарши санкцияларни 180 кунга кечиктириш ҳуқуқи берилган. Бу муддат яна 180 кунга узайтирилиши мумкин, кейинги кечикиш учун эса Конгресс овози талаб этилади.

Сенатдаги республикачилар етакчиси Жон Тун ушбу ташаббус Оқ уй ва Қонунчилик палатаси билан мувофиқлаштирилмоқдалигини тасдиқлади. Яқин кунларда қўшимча маълумотлар эълон қилиниши кутилмоқда.

Аввалроқ Трамп Владимир Путинни Украина билан музокаралардан бош тортгани учун танқид қилган ва янги санкциялар имконини кўриб чиқмоқдалигини айтган. Оқ уй эса Грэмнинг сўзларини изоҳлашдан бош тортди.