Бухоро вилояти божхона бошқармаси Контрабандага қарши курашиш бўлими ходимлари томонидан республикамиз ҳудудига олиб кирилиши тақиқланган никотин моддасининг йирик партиясини ноқонуний равишда олиб киришга бўлган уриниш фош этилди.
Маълум бўлишича, мамлакатимизга импорт божхона режими остида олиб кирилган юклар божхона ҳужжатларида парфюмерия маҳсулотлари ишлаб чиқариш учун мўлжалланган хомашё сифатида декларацияланган.
Бироқ юклар “Хавфни бошқариш тизими” томонидан “сариқ йўлак”ка йўналтирилиб, божхона кўригидан ўтказилган. Текширув жараёнида махсус тезкор экспресс мосламаси ёрдамида олинган намуналар таҳлили натижасида маҳсулот аслида суюқ никотин экани аниқланган.
Кейинчалик Х. Сулаймонова номидаги Республика суд экспертизаси маркази томонидан берилган хулосада ҳам мазкур модда асосан электрон сигареталар ишлаб чиқаришда қўлланиладиган суюқ никотин эканлиги тасдиқланган.
Дастлабки ҳисоб-китобларга кўра, умумий оғирлиги 70 килограммни ташкил этган ушбу суюқ никотиннинг қиймати 2 миллиард 100 миллион сўмга тенг эканлиги қайд этилди.
Ҳозирда ҳолат юзасидан барча процессуал ҳаракатлар якунланган бўлиб, мазкур товарлар тегишли суд қарорига асосан белгиланган тартибда йўқ қилиниши таъминланади.
Шоҳжаҳон Эргашевнинг Тошкентдаги жанги жанжал билан ниҳоясига етди
40 млн одам Жанубий Осиёдан кўчишга мажбур бўлиши мумкин
Биз Ғазо сектори ва Ливан қишлоқларини вайрон қиляпмиз, бутун дунё эса бизга қойил қолмоқда
