Xitoyda tabiiy ofatlardan ko‘rilgan zarar 7,5 milliard dollardan oshdi

Xitoyda birinchi olti oyda sodir bo‘lgan tabiiy ofatlarning oqibatlari bo‘yicha rasmiy ma’lumotlar e’lon qilindi, deya xabar beradi XXR Favqulodda vaziyatlar vazirligi.

Vazirlik ma’lumotlariga ko‘ra, birinchi olti oyda turli xil tabiiy ofatlardan 25,037 million kishi zarar ko‘rgan. Tabiiy ofatlar natijasida 307 kishi halok bo‘ldi yoki bedarak yo‘qoldi, 620 mingdan ortiq aholi zudlik bilan evakuasiya qilindi va xavfsiz hududlarga vaqtincha ko‘chirildi.

Mamlakat bo‘ylab 29,6 mingta uy butunlay vayron bo‘lgan, 347,2 mingdan ortiq uy turli darajada shikastlangan. 2,18 million gektar qishloq xo‘jaligi yerlari zarar ko‘rdi. To‘g‘ridan-to‘g‘ri iqtisodiy zarar 54,11 milliard yuanga baholanmoqda - bu taxminan 7,6 milliard AQSh dollarini tashkil etadi.

Asosiy yo‘qotishlar zilzilalar va suv toshqinlari tufayli yuzaga kelgan. Bundan tashqari, respublikaning bir qancha hududlarida do‘l, qurg‘oqchilik, to‘fon, ayoz, bo‘ron va o‘rmon yong‘inlari qayd etilgan.

Vazirlikning ta’kidlashicha, uchinchi chorakda an’anaviy ravishda yirik favqulodda vaziyatlar xavfi ortadi. Bu sanoat faolligining o‘sishi, sayyohlik oqimining ko‘payishi va transport, mehmonxona va ko‘ngilochar sohalardagi mavsumiy yuklarning ortishi bilan bog‘liq.

Suv toshqini mavsumining eng yuqori davri iyul va avgust oylarida boshlanadi, bu davrda kuchli yomg‘irlar, issiqlik to‘lqinlari va tayfunlar tez-tez uchraydi. Bu tashvishlanish uchun qo‘shimcha sababdir.