O‘zbekistonga olib kirilishi taqiqlangan mahsulotlar ro‘yxati tasdiqlandi

Vazirlar Mahkamasining 2024 yil 30 dekabrdagi tegishli qaroriga asosan O‘zbekistonga import qilinishi taqiqlangan xavfli mahsulotlar va chiqindilar ro‘yxati, o‘simliklarni himoya qilish vositalari va boshqa turg‘un organik ifloslantiruvchi moddalar, import-eksport qilinishi davlat tomonidan tartibga solinadigan va majburiy ekologik sertifikatlashtirish lozim bo‘lgan xavfli mahsulotlar hamda chiqindilar ro‘yxati tasdiqlandi.

O‘zbekiston hududida belgilangan chiqindilarni qayta ishlash va utilizasiya qilish uchun olib kiruvchilar quyidagilarga ega bo‘lishi shart.

Chiqindilarni mustaqil ravishda to‘liq utilizasiya qiladigan, qayta ishlaydigan yoki ulardan takroriy foydalanadigan import qiluvchilar – chiqindilarni utilizasiya qilish, qayta ishlash yoki takroriy foydalanish jarayonlarining atrof-muhitga ta’sir ko‘rsatishi to‘g‘risidagi bayonot loyihasi bo‘yicha davlat ekologik ekspertizasining ijobiy xulosasiga, chiqindilarni mustaqil ravishda to‘liq utilizasiya qilishi, qayta ishlash yoki ulardan takroriy foydalanish imkoniyatiga ega bo‘lmagan import qiluvchilar – mazkur chiqindilarni topshirish yoki realizasiya qilish yuzasidan chiqindilarni utilizasiya qilish va qayta ishlash bilan shug‘ullanuvchi yuridik shaxslar bilan tuzilgan shartnomaga.

Ushbu “O‘zbekiston Respublikasi hududida chiqindilar, ayrim turdagi xavfli mahsulot va kimyoviy moddalar muomalasi bilan bog‘liq nazoratni yanada takomillashtirish chora-tadbirlari to‘g‘risida”gi qarorning rasmiy e’lon qilingan kundan e’tiboran 3 oy o‘tgach kuchga kirishi belgilangan.