UYEFA, Osiyo futbol konfederasiyasi (AFK) hamda Shimoliy, Markaziy Amerika va Karib havzasi mamlakatlari futbol konfederasiyasi (KONKAKAF) qo‘shma bayonot bilan chiqib, FIFA prezidenti Janni Infantinoning xatti-harakatlari ustidan mustaqil tekshiruv o‘tkazishni talab qildi. Bu haqdagi ochiq xat UYEFA rasmiy saytida e’lon qilindi.
Munosabatga Infantinoning Jahon chempionati tijoriy va chipta sotish huquqlarining bir qismini (21 foiz ulushini) xususiy investorlarga sotish rejasi sabab bo‘lgan. Ushbu loyiha qit’a konfederasiyalarining boykot tahdidlaridan so‘ng bekor qilingan bo‘lsa-da, uchta yirik tashkilot buni futbol jamoatchiligiga nisbatan ishonchni jiddiy suiiste’mol qilish va yashirin kelishuvga urinish deb baholamoqda.
Aleksander Cheferin (UYEFA), Salman bin Ibragim Al Xalifa (AFK) va Viktor Montalyani (KONKAKAF) tomonidan imzolangan bayonotda futbol hech bir shaxs yoki alohida tashkilotga tegishli emasligi, u muxlislar, futbolchilar va klublarning umumiy mulki ekanligi alohida ta’kidlangan. FIFA rahbariyati ushbu yirik moliyaviy loyihani a’zo davlatlar hamda kengash bilan maslahatlashmay, yashirincha amalga oshirishga uringanlikda ayblanmoqda. Shu sababli konfederasiyalar FIFAning ichki surishtiruviga ishonch bildirmay, tekshiruvni butunlay mustaqil uchinchi tomon olib borishi shartligini talab qildi.
Ushbu mojaro ortidan Norvegiya, Shvesiya, Uels va Serbiya kabi bir qator futbol federasiyalari Infantinoni qo‘llab-quvvatlashdan voz kechgan yoki uni ochiqchasiga iste’foga chaqirgan. Kuzatuvchilarning fikricha, mazkur vaziyat Janni Infantino va u boshqarayotgan FIFA rahbariyati uchun so‘nggi yillardagi eng yirik siyosiy inqirozga aylanishi mumkin.
Dunyoda atigi uch kishi xorijga pasportsiz sayohat qilishi mumkin
Surxondaryoda 3700 yillik qabrlar o‘rganilmoqda
O‘zbekiston terma jamoasiga chaqirilmagan TOP-5 futbolchi
