Trampning kuyovi qurmoqchi bo‘lgan elita kurort Albaniyada ommaviy noroziliklarga sabab bo‘ldi

Albaniya poytaxti Tirana shahrida minglab namoyishchilar bir haftadan buyon AQSh prezidenti Donald Trampning kuyovi Jared Kushner bilan bog‘liq yirik qurilish loyihasiga qarshi norozilik bildirmoqda.

Namoyishlarga Adriatika dengizi sohilidagi qo‘riqlanadigan hududda qurilish ishlarining boshlanishi sabab bo‘ldi. Mahalliy hukumat ruxsati bilan Jared Kushnerga aloqador kompaniya ushbu hududda hashamatli kurort majmuasi barpo etishni rejalashtirgan.

Biroq norozilik harakati tez orada faqat qurilishga qarshi aksiyadan siyosiy talablarga aylandi. Namoyishchilar loyihaning bekor qilinishi bilan birga mamlakatni 13 yildan beri boshqarib kelayotgan Bosh vazir Edi Ramaning iste’fosini ham talab qilmoqda.

Edi Rama o‘tgan hafta parlamentda so‘zga chiqib, loyiha hali to‘liq tasdiqlanmaganini va uning atrof-muhitga ta’siri bo‘yicha baholash jarayoni yakunlanmaganini aytdi. Shuning uchun u namoyishchilarning xavotirlarini erta deb baholadi.

Namoyish ishtirokchisi Sara Bregasining Reuters agentligiga aytishicha:

«Hukumat ham, muxolifat ham korrupsiyaga botgan. Ikkalasi ham bu jarayonga aralashgan va biz nimadir o‘zgaradi deb umid qilyapmiz. Bu shunchalik katta miqyosdagi va siyosiy partiyalar ishtirok etmayotgan birinchi norozilik harakatidir».

Yana bir ishtirokchi Orgest Noka esa:

«Asosiy maqsad — hukumatni almashtirish. Men parlamentda butunlay yangi avlod siyosatchilarini ko‘rishni istayman», — dedi.

Birinchi norozilik aksiyalari may oyi oxirida boshlangan. O‘shanda qurilish kompaniyasi xodimlari kurort qurilishi rejalashtirilgan qo‘riqlanadigan sohil hududining bir qismini to‘sib qo‘ygan va dengiz bo‘yida buldozerlar paydo bo‘lgan.

To‘siqlar yonida namoyishchilar bilan xususiy qo‘riqlash xizmati xodimlari o‘rtasida to‘qnashuvlar yuz bergan. Shundan keyin norozilik harakati Tiranaga ko‘chib o‘tdi va hukumat binolari oldida ommaviy aksiyalar boshlandi.

Ma’lumotlarga ko‘ra, Jared Kushner va uning turmush o‘rtog‘i Ivanka Trampning umumiy boyligi taxminan 740 million dollar deb baholanmoqda. Bu loyiha esa hozirda Albaniyadagi eng bahsli investisiya tashabbuslaridan biriga aylangan.