Tramp tekinga oftobga chiqmaydi. Uning oilasi G‘azoni qayta qurishdan qanday daromad olmoqchi?

The Guardian yozishicha, Jared Kushnerning tinchlik haqidagi bayonotlari ortida G‘azoni qayta qurish orqali milliardlab dollar foyda olish rejasi yashiringan.

Donald Trampning kuyovi Jared Kushner yana Yaqin Sharq diplomatiyasi markazida va ehtimoliy manfaatlar to‘qnashuvi markazida bo‘ldi. Bu haqda The Guardian yozmoqda.

Kushner Oq uyda rasmiy lavozimda bo‘lmasa-da, aynan u G‘azodagi «o‘t ochishni to‘xtatish rejasi»ning yuziga aylandi, muzokaralar va ommaviy chiqishlarda faol ishtirok etdi. O‘tgan hafta u Tel-Avivdagi «garovga olinganlar maydoni»da sahnada turdi, u yerda olomon «Rahmat, Tramp!» deb qichqirdi. Kushner «G‘azo xalqining azob-uqubatlari» haqida gapirib, «bu dahshat»ni tugatishga chaqirdi.

Ammo uning tinchlikparvarlik ritorikasi ortida, gazeta ma’lumotlariga ko‘ra, hisob-kitob yashiringan: Kushner Saudiya Arabistoni, Qatar va BAAdan milliardlab dollar sarmoya kiritilgan Affinity Partners investisiya fondini boshqaradi. Ommaviy axborot vositalarining yozishicha, agar G‘azoning urushdan keyingi qurilishi boshlansa, bu jamg‘arma katta foyda olishi mumkin.

«Bu dahshatli manfaatlar to‘qnashuvi», – dedi Xalqaro siyosat markazi xodimi Mett Dass.

Uning so‘zlariga ko‘ra, Tramp ma’muriyati atrofidagi ta’sir tuzilmasi «ochiq korrupsiya»ga o‘xshaydi.

Oq uy esa har qanday qonunbuzarlikni rad etadi. «Butun dunyoda hurmatga sazovor bo‘lgan Jaredning ishtiroki noo‘rin bo‘lishi mumkinligiga shama qilish jirkanch. U o‘z vaqtini tinchlik uchun qurbon qiladi – va bu olijanoblikdir», – dedi Oq uy matbuot kotibi Kerolayn Levitt.

Nyu-Yorklik ko‘chmas mulk tadbirkor Charlz Kushnerning o‘g‘li Kushner ilgari Trampning Yaqin Sharq siyosatiga rahbarlik qilgan edi. O‘shanda uning g‘oyalari – xususan, falastinliklarni ko‘chirgandan so‘ng G‘azoni «Yaqin Sharq Riverasi»ga aylantirish – iqtisodiy mustamlakachilikning namunaviy misoli sifatida qattiq tanqidga uchragan edi.

Endi Kushner yana «soya vositachi» rolini o‘ynamoqda. U milliarder Stiv Uitkoff bilan birgalikda Isroil, Qatar va Misr vakillari bilan yopiq muzokaralarda, shuningdek HAMAS bilan vositachilik aloqalarida ishtirok etgan. The Guardian gazetasi xabar berishicha, Amerika amaldorlari Tramp Kushner va Uitkoffga tinchlikka erishish uchun «deyarli cheklanmagan vakolatlar» berganini tan olishmoqda.

Sobiq diplomatlarning aytishicha, Kushner va Uitkoff G‘azoni keng miqyosda qayta qurish – yangi turar-joy majmualari, mehmonxonalar va portlar barpo etish loyihasini qo‘llab-quvvatlamoqda. Ularning rejalariga ko‘ra, bu loyiha Isroil va Fors ko‘rfazi mamlakatlari o‘rtasidagi «mintaqaviy iqtisodiy yuksalish»ning bir qismi bo‘lishi kerak.

Tanqidchilar Kushner Yaqin Sharq diplomatiyasini o‘zining tijorat manfaatlari davomiga aylantirganini ta’kidlashmoqda. «U tinchlik shunchaki foydali bitim bo‘lgan tizimni yaratdi», – deydi sobiq amerikalik vositachi Aaron Miller.