Germaniya Gruziyadagi elchisini chaqirib oldi

Germaniya Gruziyadagi elchisi Peter Fisherni maslahatlashuv uchun chaqirib oldi, deb xabar bermoqda Germaniya Tashqi ishlar vazirligi.

"Gruziya rahbariyati bir necha oydan beri Yevropa Ittifoqi, Germaniya va shaxsan Germaniya elchisi Fisherga qarshi nafrat qo‘zg‘atmoqda. Shu sababli, Germaniya Tashqi ishlar vaziri Yohann Vadeful Fisherni maslahatlashuvlar uchun chaqirib olishga qaror qildi, bunda keyingi qadamlar muhokama qilinadi", deyiladi vazirlik bayonotida.

Germaniya TIVga ko‘ra, vaziyat Yevropa Ittifoqining Tashqi ishlar kengashida muhokama qilinadi.

Joriy yilning sentyabr oyida Fisher diplomatik munosabatlar to‘g‘risidagi Vena konvensiyasi tamoyillarini buzganlikda ayblanib, Gruziya Tashqi ishlar vazirligiga chaqirilgan. O‘shanda Gruziya bosh vaziri Irakliy Kobaxidze bu qarorni zarur diplomatik chora deb atagan. Uning so‘zlariga ko‘ra, diplomat muntazam ravishda “radikal muxolifat” faoliyatini qo‘llab-quvvatlagan.