Tramp: "AQShning Yevropadagi umumiy qo‘shinlari soni o‘zgarishsiz qolmoqda"

AQSh qo‘shinlarining bir qismi Ruminiyadan yaqinda olib chiqib ketilganiga qaramay, Yevropadagi AQSh qo‘shinlarining umumiy soni o‘zgarishsiz qolmoqda.

Bu haqda AQSh prezidenti Donald Tramp Oq uyda Vengriya bosh vaziri Viktor Orban bilan uchrashuvi avvalida jurnalistlar savollariga javob berish chog‘ida aytib o‘tdi.

"Biz o‘zgarishlar kiritmoqdamiz. Biz qo‘shinlarni ko‘chiryapmiz. Lekin bu bir xil raqam, bir xil umumiy raqam. Lekin biz odamlarni ko‘chiryapmiz", - dedi Amerika yetakchisi AQSh qo‘shinlarining Ruminiyadan olib chiqilishini sharhlar ekan.

Tramp bu Pentagonning o‘zboshimchalik bilan qabul qilingan qarori emasligini ta’kidladi. “Yo‘q, AQSh Mudofaa vazirligi rahbarlari mening gaplarimni e’tiborsiz qoldirishmayapti”, deb ta’kidladi prezident.

O‘z navbatida, AQSh Mudofaa vaziri Pit Xegset "Oq uy bilan kelishilmagan hech narsa yo‘q", deb ishontirdi. "Bularning barchasi bizning Yevropaga qarashimizning bir qismidir. AQSh qo‘shinlari Ruminiyada qoladi, biroq ularni qanday va qancha miqdorda rotasiya qilishda o‘zgarishlar bor", deb tushuntirdi Pentagon rahbari. Uning qo‘shimcha qilishicha, “hamma oldindan xabardor qilingan” va AQSh o‘z harakatlarini Buxarest va NATO bilan muvofiqlashtirgan.