Tojikiston Rossiyadan eksport taqiqlanganidan so‘ng aviayonilg‘i bo‘yicha yangi yetkazib beruvchilarni qidirmoqda

Xabarlarga ko‘ra, Tojikiston aviasiya yonilg‘isi importi bo‘yicha Qozog‘iston, Turkmaniston va boshqa davlatlar bilan muzokaralar olib boryapti.

Bu haqda mamlakat Fuqaro aviasiyasi agentligi rahbari Habibullo Nazarzoda 8 iyul kuni bo‘lib o‘tgan matbuot anjumanida Ozodlik radiosining Tojik xizmati savoliga javob berar ekan ma’lum qildi.

Nazarzodaning so‘zlariga ko‘ra, Tojikiston yonilg‘i kompaniyalari bir haftadan beri muqobil yetkazib beruvchilarni qidirmoqda.

"Hozirda biz shartnoma tuzish va importni tashkil etish uchun yonilg‘i qayerda mavjudligi haqida ma’lumot olyapmiz", — dedi u.

Mulozim muzokaralar tafsilotlarini ochiqlamadi. Yangi yetkazib beruvchilarni qidirish Moskva 1 iyundan 30 noyabrgacha aviasiya yonilg‘isi eksportini taqiqlaganidan keyin boshlandi. Shu paytgacha Tojikiston aviayonilg‘ini asosan Rossiyadan sotib olar edi. Rasmiy statistikaga ko‘ra, 2025 yilda mamlakat u yerdan 1,2 million tonnadan ortiq neft mahsulotlari import qilgan.

Matbuot anjumanida Tojikistonda qancha aviayonilg‘i qolgani ochiqlanmadi. Iyun boshida "Aziya-Plyus" agentligi Energetika vazirligiga tayanib, zaxiralar taxminan 60 ming tonna qolgani va bu noyabr oyi oxirigacha yetishi kerakligi haqida yozgan edi.

Mamlakatda aviayonilg‘i narxi avval ham e’tirozlarga sabab bo‘lgan. 2025 yil avgust oyida Turkiyaning Dushanbedagi elchisi Umut Akar "Turkish Airlines" Dushanbe aeroportida bir tonna yonilg‘i uchun 1780 dollar to‘lashini, Tojikistonning "Somon Air" kompaniyasi esa Istanbulda 930 dollar to‘lashini yozgandi.

Tojikiston rasmiylari bunga ommaviy ravishda javob qaytarmagan. Yonilg‘i yetkazib beruvchilar esa avvalroq yuqori narxlarni yonilg‘i chetdan import qilinishi bilan izohlashgan edi, deyiladi xabarlarda.