Tashiyev hokimiyatni kuch bilan egallashga urinish, shuningdek, vakolatni suiiste’mol qilish bo‘yicha ayblanmoqda

Bu haqda uning advokati Ikromiddin Aytqulov Kaktus.Media nashriga ma’lum qildi.

Ma’lum qilinishicha, Qirg‘iziston Milliy xavfsizlik davlat qo‘mitasining sobiq raisiga hech qayoqqa ketmaslik to‘g‘risida tilxat ehtiyot chorasi tanlangan, bu unga mamlakatni tark etish taqiqlanganini bildiradi. Ishni Qirg‘iziston Ichki ishlar vazirligi tergov qilmoqda.

Advokat Tashiyev o‘ziga qo‘yilgan ayblovni tan olmaganini ma’lum qildi. Qirg‘iziston IIV hozircha bu haqda rasman xabar bermadi.

29 aprel kuni Tashiyev vazirlikning bosh tergov boshqarmasiga ikki marta so‘roq uchun chaqirilgani xabar qilingandi (https://t.me/burchakostida/74842). Tundagi ikkinchi so‘roqdan keyin unga nisbatan ayblov e’lon qilingani haqidagi ma’lumot tasdiqlandi.

Tashiyev o‘zining aybsizligini va sud adolatli qaror qabul qilishiga ishonishini aytmoqda. U o‘z tarafdorlarini qonun doirasida harakat qilishga va namoyishlar uyushtirmaslikka chaqirgan (https://t.me/burchakostida/74856).

10 fevral kuni Tashiyev lavozimidan ozod etilgandi. Prezident Sadir Japarov bu qarorini jamiyatdagi bo‘linishning oldini olish istagi bilan izohlagan.