Isroildagi «Likud» partiyasi asoschisi Menaxem Beginning o‘g‘li Benni Begin partiya tarafdorlarini Binyamin Netanyahu hukumatini hokimiyatdan chetlatishga chaqirdi. Uning fikricha, amaldagi bosh vazir barcha isroilliklar uchun xavf tug‘dirmoqda.

«Tasnim» agentligi xabar berishicha, Isroil parlamentining sobiq a’zosi Benni Begin videomurojaat orqali «Likud» tarafdorlarini Netanyahu hukumatiga qarshi bo‘lgan siyosiy kuchlarni qo‘llab-quvvatlashga chaqirgan.

U murojaatida Netanyahu boshchiligidagi hukumat avvallari mamlakat manfaatlari yo‘lida ishlaganini ta’kidlagan. Benni Beginning aytishicha, o‘n-o‘n besh yil avval u Netanyahu rahbarlik qilgan hukumat tarkibida bo‘lgan va o‘sha davrda samarali muzokaralar olib borilgan, kelishmovchiliklar esa do‘stona muhitda hal etilgan.

Benni Begin — Isroilning sobiq bosh vaziri va «Likud» partiyasi asoschisi Menaxem Beginning o‘g‘li. Uning Netanyahu hukumatiga qarshi chaqiriqlari mamlakatdagi siyosiy keskinlik kuchaygan bir paytda yangradi.