Rossiya urushni davom ettira oladimi? Bir kunlik xarajat – 1 milliard dollar!

Ukraina razvedkasi Rossiyaning urushda tanaffus xohlashining sababini tushuntirdi.

Ukraina Mudofaa vazirligi Bosh razvedka boshqarmasi boshlig‘i Kirill Budanov Rossiyada Ukrainaga qarshi urushda tanaffus qilish zaruratining barcha belgilari mavjudligini ma’lum qildi. U bu haqda Deutsche Welle'ga bergan izohida aytib o‘tdi.

Uning so‘zlariga ko‘ra, rossiyaliklar o‘zlarining ishlab chiqarish imkoniyatlari chegarasiga yetib borgan.

"Razvedka rahbaridan so‘rasangiz, qanday belgilar deyapsiz? Ha, buning barcha belgilari bor, mutlaqo hammasi," deya javob berdi u jurnalistlar savoliga.

Budanov ta’kidlashicha, Rossiya allaqachon harbiy ishlab chiqarishning eng yuqori darajasiga erishgan va hozirgi hajmdan ortiq qurol-yarog‘ ishlab chiqarishni ko‘paytira olmaydi.

Rossiya Federasiyasi uchun tanaffus talab qiladigan yana bir omil - bu jang harakatlarining yuqori narxidir. Bosh razvedka boshqarmasi rahbarining ta’kidlashicha, urushning bir kuni Moskvaga deyarli bir milliard dollarga tushmoqda, bu Rossiyaning rasmiy byudjetining qariyb 41 foizini tashkil etadi.

"Rossiya o‘z mablag‘larini sarflamoqda. Bu borada bizning hamkorlarimiz bor va ular ham o‘z mablag‘larini sarflashmoqda," deya qo‘shimcha qildi Budanov.