Rossiya NATO davlatlariga yadroviy zarba berish bilan tahdid qildi

Rossiya Kaliningrad qamal qilinsa, NATO davlatlariga yadroviy zarba berish bilan tahdid qildi.

Agar NATO mamlakatlari Kaliningrad viloyatini Rossiyaning qolgan qismidan yakkalab qo‘yishga urinsa, Moskva o‘zining butun arsenalini, jumladan, yadroviy qurolni ham qo‘llashga tayyor bo‘ladi, deyiladi Rossiyaning Irlandiyadagi elchixonasi bayonotida. Avvalroq Rossiyaning Belgiyadagi elchixonasi ham shunday mazmundagi bayonotni e’lon qilgan edi.

Moskva bir yoki bir nechta Yevropa mamlakatlariga harbiy bostirib kirishga tayyorgarlik ko‘rayotgani va gibrid hujumlarni kuchaytirayotgani haqidagi da’volarni rad etmoqda. Shu bilan birga, rossiyalik rasmiylarning ta’kidlashicha, G‘arb tomonidan Rossiyaning milliy xavfsizligiga "jiddiy va real tahdid" yuzaga kelmoqda.

Xususan, Kaliningrad viloyatiga nisbatan "tahdid" haqida gap ketganda, Rossiyaning Irlandiyadagi elchixonasi 2026 yil iyun oyida bo‘lib o‘tgan "Gallant Boar 2026" Litva-Polsha-Fransiya qo‘shma harbiy mashg‘ulotlarini tilga olgan. Litva Qurolli Kuchlarining ma’lumotlariga ko‘ra, ushbu manyovrlardan maqsad Suvalki yo‘lagini tez va samarali himoya qilish ko‘nikmalarini mashq qilish bo‘lgan. Rossiyaning fikriga ko‘ra esa, mashg‘ulotlar "Rossiyaning eksklav hududi hisoblanuvchi Kaliningrad viloyatiga qarshi qaratilgan" edi.