Shveysariya betaraflik tamoyilini kuchaytirishdan bosh tortdi

Shveysariya aholisining aksariyati mamlakat betarafligini mustahkamlashga qaratilgan referendumda tashabbusga qarshi ovoz berdi, deb xabar beradi DW.

Dastlabki ma’lumotlarga ko‘ra, saylovchilarning 71 foizi "Shveysariya betarafligini saqlash" tashabbusiga qarshi ovoz bergan. Ushbu ma’lumotlar gfs.bern jamoatchilik fikrini o‘rganish instituti tomonidan taqdim etilgan. Xuddi shunday natijani Shveysariya teleradio kompaniyasi SRF ham e’lon qildi.

Tashabbus mualliflari Konstitusiyada "doimiy qurolli betaraflik" tamoyilini aniqroq mustahkamlashni taklif qilishdi. Xususan, Shveysariyaning harbiy va mudofaa ittifoqlarida ishtirokini cheklash, shuningdek, qurolli mojarolarda ishtirok etayotgan davlatlarga nisbatan iqtisodiy sanksiyalar qo‘llash imkoniyatini sezilarli darajada kamaytirish ko‘zda tutilgan. BMT Xavfsizlik Kengashi tomonidan tasdiqlangan choralar, shuningdek, sanksiyalarni chetlab o‘tishning oldini olishga qaratilgan harakatlar bunga kiritilmagan.

Tashabbus Pro Schweiz uyushmasi tomonidan ilgari surilgan. Uning tarafdorlari qat’iyroq qoidalar mamlakatning an’anaviy betarafligini mustahkamlaydi va Shveysariyaning xalqaro mojarolarga tortilish xavfini kamaytiradi, deb hisoblashgan.

Federal kengash va parlament bu taklifga qarshi chiqdi. Tashabbusga qarshi bo‘lganlar, mavjud model hokimiyatga tashqi siyosat va xalqaro hamkorlik masalalarida zarur erkinlik berishini ta’kidlamoqdalar.

Shveysariyada betaraflik tamoyili Konstitusiyada mustahkamlangan. Biroq, uning amaliy qo‘llanilishi xalqaro huquq va federal hokimiyat qarorlari bilan ham tartibga solinadi.