Rossiya Moliya vazirligi va Markaziy bank Putinni ogohlantirdi

Ogohlantirish mamlakat harbiy xarajatlarni hozirgi darajada saqlab qololmasligi haqida deb yozmoqda Bloomberg.

Amaldagi mudofaa xarajatlari byudjet defisitining xavfli darajada oshishiga olib kelishi mumkin, deya ogohlantirdi rasmiylar prezidentni. Agentlikning yozishicha, ushbu vaziyat fonida moliyaviy va siyosiy blok vakillari, shuningdek, xarajatlarni oshirishni talab qilayotgan Mudofaa vazirligi o‘rtasida kelishmovchiliklar boshlangan.

Jurnalistlar buni "Rossiyada urush yuzaga kelgan ichki kelishmovchiliklarning eng jiddiy belgisi" deb atashmoqda. Agentlik xabariga ko‘ra, Vladimir Putin iqtisodiy blokka mudofaaga aloqador bo‘lmagan byudjet xarajatlarini tejash bo‘yicha topshiriq bergan.

Avvalroq Financial Times gazetasi Rossiya moliya vaziri Anton Siluanovning hukumatga yuborgan maktubiga tayanib, Rossiya byudjetida aynan urushga bog‘liq bo‘lmagan xarajatlar moddalari qisqartirilishi haqida xabar bergan edi.

Bu ma’lumotni The Bell nashri ham tasdiqladi. Siluanovning maktubida mudofaa bilan bog‘liq xarajatlarning umumiy ortiqcha sarfi bazaviy ssenariyda 2 trillion rubl, eng yomon holatda esa 4 trillion rubl deb baholangan. Bloomberg’ning ikki manbasiga ko‘ra, 2026 yilda Mudofaa vazirligidagi defisit 3 trillion rublga yetishi mumkin.