Qozog‘iston AQShning Eronga zarbalariga oid tashvishini bildirib, keskinlikni pasaytirishga chaqirdi

Qozog‘iston Tashqi ishlar vazirligi AQSh tomonidan Eron hududidagi, jumladan yadroviy infratuzilmaga qilingan zarbalardan keyin Yaqin Sharqda vaziyat keskinlashgani munosabati bilan rasmiy bayonot bilan chiqdi.

Astanada ta’kidlashlaricha, keskinlikning yanada kuchayishi nafaqat ishtirokchi tomonlar uchun, balki Markaziy Osiyo davlatlari hamda butun mintaqaning xavfsizligi uchun tahdid hisoblanadi.

Qozog‘iston Eron bilan konstruktiv munosabatlarga ega ekanini yodga solib, barcha taraflarni mavjud nizolar, jumladan yadroviy dastur bilan bog‘liq masalalarni faqatgina muloqot orqali va xalqaro huquq hamda BMT Nizomi doirasida hal etishga chaqirdi.

Qozog‘iston an’anaviy ravishda xalqaro inqirozlarni diplomatik yo‘llar bilan hal etish tarafdori hisoblanadi.