Qamchibek Tashiyev ishi bo‘yicha sud vaqtinchalik qoldirildi

Qirg‘iziston Milliy xavfsizlik davlat qo‘mitasi (MXDQ) sobiq rahbari Qamchibek Tashiyevning ishi bo‘yicha sud jarayoni ayblanuvchilarning bir qismi ish materiallari bilan tanishishga ulgurmagani sababli qoldirildi. Bu haqda uning advokati Ikromiddin Aytqulov ma’lum qildi.

Huquqshunosning so‘zlariga ko‘ra, sud majlisi bir vaqtning o‘zida bir nechta sabablarga ko‘ra ko‘chirilgan. Xususan, ayrim ayblanuvchilar hozircha jinoyat ishi materiallari bilan tanishib chiqishga ulgurmagan.

Bundan tashqari, himoya tomoni mavjud dalillar bo‘yicha tergov qarorlari ustidan Bishkek shahar sudiga apellyasiya shikoyati kiritgan.

"Bishkek shahar sudi shikoyat bo‘yicha qaror chiqarganidan keyin, sud jarayoni Bishkekning Birinchi may tuman sudida davom etadi. Qamchibek Tashiyev sud majlislarida ishtirok etadi", — dedi advokat.

Uning eslatishicha, MXDQ sobiq rahbari hokimiyatni zo‘ravonlik bilan egallashga tayyorgarlik ko‘rish va xizmat mavqeini suiiste’mol qilishda ayblanmoqda. Shu bilan birga, advokatning aytishicha, ish materiallari maxfiylashtirilgan. Shu sababli sud majlislari yopiq tartibda bo‘lib o‘tadi, tergov va sud ma’lumotlarini oshkor qilish esa taqiqlanadi.