Eron AQShdan yangi tinchlik shartnomasi loyihasini oldi

Eron AQShdan yangi tinchlik shartnomasi loyihasini oldi. Tramp Tehrondan "kerakli javoblar" kutayotganini, aks holda urushni qayta boshlashga tayyorligini ma’lum qildi

Bu haqda Eronning Tasnim axborot agentligi o‘z manbalariga tayanib xabar bermoqda.

Agentlikning yozishicha, AQSh tomoni hujjatni Pokiston vositachiligida yetkazgan. Tehron hozirda matnni o‘rganmoqda va hali javob bergani yo‘q.

Donald Tramp agar Eron tinchlik shartnomasiga rozi bo‘lmasa, AQSh Tehronga zarbalar berishni davom ettirishga tayyorligini aytdi. Shu bilan birga, u Vashington "to‘g‘ri javoblarni olish" uchun bir necha kun kutib turishi mumkinligini istisno qilmadi.

"Ishoning, agar biz to‘g‘ri javoblarni ololmasak, hamma narsa juda tez sodir bo‘ladi", — dedi Donald Tramp.

Jurnalistlarning shartnoma loyihasiga javobni u qancha kutishga tayyorligi haqidagi savolga Tramp: "Bu bir necha kun bo‘lishi mumkin yoki juda tez sodir bo‘lishi mumkin", — deb javob qildi.

Axios agentligining ma’lumotlariga ko‘ra, Tramp Eron bilan kelishuvga erishish bo‘yicha ushbu yangi urinishni Isroil Bosh vaziri Binyamin Netanyahu bilan telefon orqali muhokama qilgan. Manbalarning bildirishicha, Tramp vositachilar Vashington va Tehron o‘rtasida urushni rasman yakunlash va 30 kunlik muzokaralar davrini boshlash uchun imzolanishi kerak bo‘lgan "niyatlar maktubi" ustida ishlayotganini aytgan, deyiladi xabarda.