Osiyo taraqqiyot banki Qoraqalpog‘iston yo‘llarini modernizasiyasi uchun mablag‘ ajratadi

Osiyo taraqqiyot banki (OTB) O‘zbekiston Respublikasiga Markaziy Osiyo mintaqaviy iqtisodiy hamkorlik 2-koridorining asosiy qismini modernizasiya qilish uchun 233,1 million AQSh dollari miqdorida kredit ajratishni ma’qulladi.

Loyiha mintaqaviy aloqani yaxshilash, sayohat vaqtini qisqartirish, yo‘l harakati xavfsizligini oshirish va mamlakatning g‘arbiy hududlarida transport infratuzilmasining iqlim o‘zgarishiga chidamliligini oshirishga qaratilgan.

CAREC-2 yo‘l yo‘lagi mustahkamligi va modernizasiyasi loyihasi Qoraqalpog‘iston Respublikasidagi G‘uzor–Buxoro–Nukus–Beynau (A380) yo‘lining taxminan 87 kilometrini rekonstruksiya qilishni nazarda tutadi.

Loyihada iqlimga chidamlilik elementlari nazarda tutilgan bo‘lib, ular qatorida sement-beton qoplamasi, baland qilingan toshqonlar va takomillashtirilgan drenaj tizimlari mavjud. Ushbu choralar iqlim o‘zgarishi oqibatlari va ekstremal ob-havo sharoitlariga qarshi turishga qaratilgan.

Ushbu investisiyalar O‘zbekistonning mintaqaviy tranzit markazi sifatidagi rolini mustahkamlaydi hamda Qoraqalpog‘istonda inklyuziv iqtisodiy o‘sishga xizmat qiladi, — deya ta’kidladi OTBning O‘zbekistondagi vakolatxonasi direktori Kanokpan Lao-Araya.

Uning so‘zlariga ko‘ra, iqlimga chidamli infratuzilma va intellektual transport tizimlarini joriy etish uzoq muddatli barqarorlikni ta’minlab, aholi va biznes uchun harakatlanishni yanada xavfsiz va samarali qiladi.