Odessadagi qonli voqea: Yevropa sudi Ukrainani aybdor deb topdi

Inson huquqlari bo‘yicha Yevropa sudi (IHES) 2014 yil 2 may kuni Odessada Rossiya va Ukraina tarafdori bo‘lgan faollar o‘rtasidagi to‘qnashuvlar paytida 47 kishi halok bo‘lgani bilan bog‘liq davlatning harakatsizligi haqidagi bir qator da’volar bo‘yicha qaror chiqardi.

The Insider nashrining xabar berishicha, sud voqealar asosan Rossiya targ‘iboti tufayli yuz berganini ta’kidlagan bo‘lsa-da, Ukraina davlati tomonidan yo‘l qo‘yilgan qonunbuzarliklarni ham alohida qayd etgan va endi davlat tovon to‘lashga majbur bo‘ldi.

IHES qarori "Maydonga qarshi" separatistlarning Ukraina tarafdori namoyishchilariga hujumi bilan boshlangan fojiali voqealarga taalluqli. Keyingi to‘qnashuvlar Kulikovo maydonidagi "Maydonga qarshi" guruh lageriga hujum va Kasaba uyushmalari uyidagi yong‘inga olib keldi, bu yerda o‘nlab odamlar halok bo‘ldi. Da’vogarlar orasida halok bo‘lgan 25 kishining qarindoshlari va yong‘indan omon qolgan uch kishi bor.

Sud ta’kidlashicha, Odessa polisiyasi namoyishchilarga o‘qotar qurol bilan hujum qilinishining oldini olish uchun "amalda hech narsa qilmagan", tartibsizliklarga tayyorgarlik haqidagi ko‘plab operativ ma’lumotlarni e’tiborsiz qoldirgan. Shuningdek, IHES "yong‘in o‘chirish mashinalarining hodisa joyiga yetib kelishi ataylab 40 daqiqaga kechiktirilgani va polisiya odamlarni yonayotgan binodan evakuasiya qilishga yordam berish uchun aralashmagani"ni isbotlangan deb hisoblamoqda.

Ukraina Inson huquqlari bo‘yicha Yevropa konvensiyasining yashash huquqiga oid moddasini buzganlikda aybdor deb topildi. Davlat har bir halok bo‘lgan kishining qarindoshlariga 15 ming yevrodan va og‘ir kuyish jarohatini olgan uchta tirik qolgan da’vogarga 12 ming yevrodan to‘lashi shart. Eng katta, 17 ming yevro miqdoridagi tovon pulini Kasaba uyushmalari uyida halok bo‘lgan Mixail Vyacheslavovning qizi oladi, chunki hokimiyat uning otasining jasadini dafn etish uchun berishni asossiz ravishda uzoq vaqt rad etgan.