NATO bosh kotibi Tramp Putin bilan uchrashishdan bosh tortgan bir paytda Vashingtonga keladi

NATO Bosh kotibi Mark Ryutte e’lon qilinmagan tashrif bilan bugun Vashingtonga keladi.

Bu haqda Reuters agentligi yuqori martabali mulozimiga tayanib xabar bermoqda.

"Tramp payshanba kuni Oq uyda NATO bosh kotibi bilan uchrashadi", — deyiladi xabarda.

Uning kelishi, muxbirning so‘zlariga ko‘ra, Yevropaning Donald Trampning so‘nggi "diplomatik manyovri"ga tezda javob qaytarish istagi bilan bog‘liq, u G‘arb OAVlarining yozishicha, Budapeshtda Rossiya yetakchisi Vladimir Putin bilan uchrashishdan bosh tortgan.

Avvalroq NBC telekanali Oq uydagi manbaga tayanib, Putin-Tramp uchrashuviga tayyorgarlik Moskvaning Rossiya-Ukraina urushi bo‘yicha qat’iy pozisiyasi va yon berishni istamagani tufayli to‘xtatilganini ma’lum qilgandi.

Reuters agentligi diplomatik manbalarga tayanib, Moskvaning Ukrainada zudlik bilan o‘t ochishni to‘xtatishga qarshiligi Rossiya va AQSh prezidentlarining Vengriyadagi uchrashuvini xavf ostiga qo‘yganini xabar qildi.

Reuters manbalariga ko‘ra, Rossiya tashqi ishlar vaziri Sergey Lavrov va AQSh Davlat kotibi Marko Rubio o‘rtasidagi uchrashuv ham qoldirildi, bu esa Vashington ma’muriyati Moskva yon bermasa, sammitni o‘tkazishni istamasligi mumkinligidan dalolat beradi. "Menimcha, Rossiya juda ko‘p narsani xohladi va Budapeshtda Tramp bilan hech qanday kelishuv bo‘lmasligi AQShga ayon bo‘ldi", — dedi manba.

Keyinroq Oq uy matbuot kotibi jurnalistlarga Tramp yaqin kelajakda Putin bilan uchrashishni rejalashtirmayotganini aytdi.

21 oktyabr kuni Ukraina prezidenti Vladimir Zelenskiy va Yevropa yetakchilari Trampning harbiy harakatlarni zudlik bilan to‘xtatish haqidagi taklifini qo‘llab-quvvatladi. Biroq Rossiya o‘t ochishni to‘xtatish kelishuvini qabul qilmasligini ta’kidladi va “mojaroning asosiy sabablari”ni bartaraf etishni o‘z ichiga olgan holda keng qamrovli kelishuv tarafdori. Moskva Ukrainadan NATOga a’zo bo‘lish rejalaridan voz kechishni, Rossiyadan Qrim va Donbass ustidan nazoratni o‘tkazishni talab qilmoqda.