Messi afsonaviy Peleni ortda qoldirdi

«Inter Mayami» va Argentina milliy terma jamoasi hujumchisi Lionel Messi afsonaviy futbolchi Pelening rekordini yangiladi.

Messi MLS chempionati doirasida «Nyu-York Siti»ga qarshi o‘yinda (3:2) jarimadan to‘g‘ridan-to‘g‘ri zarba orqali gol urdi. Bu gol argentinalik hujumchining faoliyatidagi jarimadan kiritilgan 71-goli bo‘ldi. Pele esa o‘z vaqtida bunday 70 ta gol urgan.

Ushbu ko‘rsatkich bo‘yicha hali ham yetakchi — Juninyo Pernambukano bo‘lib, u jarimadan 77 marta gol kiritgan. Ro‘yxatda uchinchi o‘rinni «An-Nasr» va Portugaliya terma jamoasi hujumchisi Krishtianu Ronaldu egallab turibdi — 64 ta gol.

Joriy mavsumda Lionel Messi «Inter Mayami» safida 6 ta o‘yinda ishtirok etib, 5 ta gol urdi.