"Manchester Siti" "Barselona" futbolchisi uchun 100 mln yevro to‘lashga tayyor

"Manchester Siti" joriy mavsum yakunidan so‘ng "Barselona"ning ispaniyalik xavbeki Pedri uchun katta miqdorda pul taklif qiladi.

"El Nacional" nashri ma’lumotiga ko‘ra, Manchester klubi 22 yoshli ispaniyalik futbolchini yozgi transfer oynasida safiga qo‘shib olmoqchi. "Shaharliklar" o‘yinchi uchun taxminan 100 mln yevro to‘lashga tayyor. Ta’kidlash joizki, "Siti" Pedrini yozda klubini o‘zgartirishi mumkin bo‘lgan Kevin de Bryuynega o‘rinbosar deb bilmoqda. Pedrining o‘zi hozircha "Barselona"dan ketish istagini bildirmayapti.

Pedri ushbu mavsum "ko‘k-anorranglilar" uchun Ispaniya chempionatida 28 ta o‘yin o‘tkazib, 4 ta to‘p kiritdi hamda 4 ta golga assistentlik qildi.