Fransiya prezidenti Emmanuel Makron Afrikaga safari davomida qit’a davlatlari rahbarlarini Rossiya–Afrika sammitida ishtirok etmaslikka ko‘ndirishga urinishi mumkin. Bu haqda Rossiya tashqi ishlar vaziri Sergey Lavrov Ukrainadagi vaziyat bo‘yicha elchilar ishtirokidagi davra suhbatida ma’lum qildi.

«Makron janoblari Afrikaga safar qildi. Bizdagi mavjud faktlarga asoslangan shubhalarimizga ko‘ra, u afrikalik do‘stlarimizni Rossiya–Afrika sammitida ishtirok etishdan eng yuqori darajada qaytarish uchun qo‘lidan kelgan barcha ishni qiladi», — dedi Lavrov.

Rossiya tashqi ishlar vaziri Moskva afrikalik hamkorlarini mustaqil va o‘zini o‘zi ta’minlay oladigan davlatlar sifatida qabul qilishini ta’kidladi. Shu sababli Rossiya bunday usullarga murojaat qilmasligini bildirdi.

Rossiya–Afrika uchinchi sammiti 28–29 oktyabr kunlari Moskvada bo‘lib o‘tishi rejalashtirilgan. Forumda Rossiyaning Afrika davlatlari bilan strategik hamkorligini mustahkamlash, iqtisodiy va gumanitar aloqalarni kengaytirish hamda ko‘p qutbli dunyoda qo‘shma tashabbuslarni ilgari surish masalalari muhokama qilinadi.