Londonda Eron oliy rahbariga aloqador deb gumon qilinayotgan ikki elit kvartira sotuvga qo‘yildi

Londonning Kensington tumanida Eron oliy rahbari Mujtaba Xomanaiyga aloqador deb gumon qilinayotgan ikki elit kvartira sotuvga qo‘yildi. Bu haqda The Sunday Times xabar berdi.

Mulklarning rasmiy egasi sifatida Eronlik bankir va tadbirkor Ali Ansariy ko‘rsatilgan. U AQSh Moliya vazirligi tomonidan Mujtaba Xomanaiyning «asosiy moliyaviy vositachisi» sifatida ta’riflangan va 2026 yil iyul oyida sanksiyalar ro‘yxatiga kiritilgan. Vashington Ansariyni Eron fuqarolarining mablag‘larini o‘zlashtirishda ham ayblagan.

Kvartiralar Londondagi 3a Palace Green manzilida, Kensington saroyi yaqinida joylashgan. Ular 2014 va 2016 yillarda jami qariyb 36 million funt sterlingga sotib olingan.

Ulardan biri besh xonali dupleks bo‘lib, oltinchi va yettinchi qavatlarni egallaydi. Maydoni 3 944 kvadrat futni tashkil etadi. 2016 yilda 19 million funtga xarid qilingan ushbu kvartira hozir qariyb 12 million funtga sotuvga qo‘yilgan.

Ikkinchi kvartira yettinchi va sakkizinchi qavatlarda joylashgan bo‘lib, 2014 yilda 16,75 million funtga sotib olingan. Har ikki mulk ham qarzdorliklar sababli qabul qiluvchilar boshqaruviga o‘tgan.

Ma’lumotlarga ko‘ra, Ansariy ipoteka majburiyatlarini bajara olmaganidan so‘ng Britaniya hukumati mulklarni sotishga ruxsat bergan. Sotuvdan qarzlar qoplanganidan keyin qoladigan mablag‘lar Ansariy sanksiyalar ostida qolar ekan, muzlatib qo‘yilishi kutilmoqda.

Shu bilan birga, Xomanaiyning ushbu kvartiralarning bevosita egasi ekani rasman tasdiqlanmagan. Ommaviy axborot vositalarida ular Ansariy orqali Eron oliy rahbariga bog‘langani haqida ma’lumotlar keltirilmoqda.