London Suriyaning yangi hukumatini tan oldi

Buyuk Britaniya tashqi ishlar vaziri Devid Lemmi Suriyaga rasmiy tashrif buyurib, ikki davlat o‘rtasidagi diplomatik aloqalarni tiklash va Damaskdagi yangi hukumatni qo‘llab-quvvatlash haqida e’lon qildi.

Britaniya Tashqi ishlar vazirligi ma’lumotiga ko‘ra, bu so‘nggi 14 yil ichida Londondan bunday darajadagi amaldorning Suriyaga ilk tashrifidir. Tashrif doirasida Lemmi Suriya prezidenti Ahmad ash-Sharo va tashqi ishlar vaziri Esaad ash-Shaybaniy bilan muzokaralar o‘tkazdi.

Lemmi London Suriyadagi yangi hukumatni qo‘llab-quvvatlashini va mamlakatda inklyuziv siyosiy o‘tish jarayonini muhim deb hisoblashini ta’kidladi:

«O‘n yildan ortiq davom etgan mojarodan so‘ng suriyaliklar yangi umidga ega bo‘lishdi. Britaniya o‘z manfaatlari yo‘lida yangi hukumatga barqaror, xavfsiz va farovon kelajak qurishda yordam beradi», — dedi vazir.

Lemmining ta’kidlashicha, barqaror Suriya Britaniyaning manfaatlariga mos keladi — bu noqonuniy migrasiya xavfini kamaytiradi, kimyoviy qurol zaxiralarini yo‘q qilish va terrorizmga qarshi kurashda (jumladan DAYEShga qarshi) samarali bo‘ladi.

Undan tashqari, London Suriyaga £94,5 million (taxminan $129 million)lik qo‘shimcha gumanitar yordam ajratishini ma’lum qildi.

Aprel oyidan boshlab Britaniya, Yevropa Ittifoqi va AQSh Suriyaning bir qator idoralari — Markaziy banki, vazirliklar, razvedka xizmatlari va energetika sohasidagi kompaniyalarga qo‘yilgan sanksiyalarni bekor qilishni boshladi. Bu xalqaro hamkorlikni tiklashga qaratilgan navbatdagi qadam sifatida baholanmoqda.