Kongressmenlar Trampning Isroil-Eron mojarosiga aralashish vakolatini cheklamoqchi

AQShda ayrim respublikachi va demokrat kongressmenlar ma’muriyatdan Yaqin Sharqda urush boshlashdan oldin Kongress ma’qullashini talab etuvchi qaror bo‘yicha ovoz berish niyatida, deb xabar beradi NBC News.

Yangi shakllangan koalisiyaga Prezident Donald Trampning konservativ tarafdorlari, shuningdek, AQShning Kongress roziligisiz xalqaro mojarolarda ishtirok etishiga qarshi chiqqan progressiv demokratlar kirmoqda.

Moliyaviy masalalarda Trampga qarshi chiqishdan cho‘chimagan Kentukki shtatidan respublikachi vakil, libertarian Tomas Messi Kaliforniya shtatidan demokrat Ro Xanna bilan birgalikda ma’muriyatni har qanday mojaraga jiddiy aralashishdan avval Kongressdan ruxsat olishga majburlovchi harbiy vakolatlar to‘g‘risidagi qaror bo‘yicha ovoz berishni talab qilishga intilmoqda.

“Bu bizning urush emas. Hatto agar shunday bo‘lsa ham, Konstitusiyamizga muvofiq bunday masalalarni Kongress hal qilishi kerak”, – deb yozdi Tomas Messi X (Twitter) ijtimoiy tarmog‘ida.

Uning bayonoti Nyu-Yorkdan Aleksandriya Okasio-Kortes va Michigandan Rashida Tlaib kabi progressiv demokratlarni ushbu qonun loyihasini qo‘llab-quvvatlashga undadi.

“Men bu qarorni qo‘llab-quvvatlash imkoniyatini intiqlik bilan kutyapman. Amerikaliklar endilikda bunday nayranglarga ishonmaydi. Bizga Iroqdagi «ommaviy qiruv quroli» haqida yolg‘on aytishgan, bu millionlab odamlarning hayotiga va taqdiriga ta’sir ko‘rsatgan. Tramp Kongress ovoz bermaguncha urush boshlay olmaydi”, – dedi Rashida Tlaib.

Messi va Xanna ushbu tashabbusni yaqin kunlarda Palatada to‘liq ovoz berishga olib chiqish maqsadida afzallikka ega qaror sifatida taqdim etishni rejalashtirmoqda. Trampga yaqin Luiziana vakili, spiker Mayk Jonson ushbu harbiy vakolat to‘g‘risidagi qarorni bekor qilish imkoniyatiga ega bo‘lishi mumkin.

Vashingtonda, Virjiniya shtatidan demokrat senator Tim Keyn Trampning AQShni Eronga qarshi urushga bir tomonlama tortishiga yo‘l qo‘ymaslik harakatlarini boshqarmoqda.

“Men Isroil va Eron o‘rtasidagi harbiy qarama-qarshilikning so‘nggi avj olishi AQShni yana bir tugamas mojaroga tortishi mumkinligidan xavotirdaman. Amerika xalqi Yaqin Sharqda yana bir tugamas urushda ishtirok etishni xohlamaydi”, – dedi Tim Keyn.

Messi va Xanna Trampning ilk ma’muriyati davrida ham AQShning Yamandagi urushdagi ishtirokini cheklashga qaratilgan shunga o‘xshash qaror mualliflaridan bo‘lishgan. Garchi Tramp bu qarorni (Qo‘shma Palata va Senat qabul qilganidan so‘ng) imzolamagan bo‘lsa-da, AQSh armiyasining faol ishtirokini to‘xtatishga qaror qilgan.