Italiya vizalar markazi Rossiya fuqarolari uchun turistik vizalarga arizalarni ko‘rib chiqish muddatini 60 kundan 45 kungacha qisqartirdi. Bu haqda markazning rasmiy saytida ma’lum qilindi, deb xabar bermoqda RIA Novosti.

Vizalar markazi safarlarni rejalashtirishda yangilangan muddatlarni hisobga olishni tavsiya qildi.

Rossiya Turoperatorlar assosiasiyasi (ATOR) ma’lumotlariga ko‘ra, Italiya 2025 yilda Rossiya fuqarolariga qariyb 160 mingta Shengen vizasini bergan. Bu Yevropa Ittifoqi mamlakatlari orasidagi yuqori ko‘rsatkichlardan biri hisoblanadi.

Avvalroq Yevropa Ittifoqi Rossiya fuqarolari uchun viza tartibini yanada qat’iylashtirishi mumkinligi haqida xabarlar tarqalgan edi. OAV suhbatdoshlarining ta’kidlashicha, Fransiya va Italiya Rossiya fuqarolarining katta oqimini qabul qilishi sababli ushbu tashabbusga avvalroq qarshi chiqqan.