Isroil sudi 15 yoshli falastinlikni 18 yilga ozodlikdan mahrum qildi

Isroil sudi Sharqiy Quddus shimolidagi Shuafat qochqinlar lageridan bo‘lgan 15 yoshli Muhammad Basil Zelbaniyni 18 yil qamoq jazosiga hukm qildi.

Falastin Mahbuslar Jamiyati bayonotiga ko‘ra, Zelbaniy ishg‘olga qarshilik ko‘rsatganlikda ayblangan. Shuningdek, sud unga 300 000 shekel (83 333 AQSh dollari) miqdorida jarima tayinlagan.

Zelbaniy 2023 yil 13 fevraldan beri hibsda saqlangan. Isroil harbiylari uning oilasi yashagan uyni buzib tashlagan.

Sud ishg‘olga qarshi kurashni “jinoyat” sifatida baholab, falastinlik yoshning ozodlik huquqini rad etgan.

Falastin Mahbuslar Jamiyati ma’lumotiga ko‘ra, 2023 yil 7 oktyabrdan buyon G‘arbiy Sohil va Sharqiy Quddusda 14 500 falastinlik qo‘lga olingan, ular orasida 1115 nafar bola ham bor.

Isroil kuchlari tomonidan amalga oshirilayotgan hibslar, reydlar va hujumlar soni keskin oshgan.