Infantino va Tramp G‘azo sektorida futbolni tiklash uchun 75 million dollar ajratadi

FIFA prezidenti Janni Infantino va AQSh prezidenti Donald Tramp G‘azo sektorida futbol infratuzilmasini qayta tiklash loyihalari uchun 75 million dollar mablag‘ yo‘naltirishga qaratilgan yirik sheriklik boshlanganini e’lon qilishdi. Bu haqda The Athletic nashri xabar bermoqda.

Ushbu tashabbus futboldan mintaqani tiklash vositasi sifatida foydalanishni nazarda tutadi. Dastur nafaqat sport ob’ektlari qurilishini moliyaviy qo‘llab-quvvatlashni, balki mahalliy aholiga yordam berish uchun dunyo futbol yulduzlarini mojaro hududiga yuborishni ham o‘z ichiga oladi.

Bu haqda Tramp ma’muriyati tomonidan global mojarolarni hal qilish uchun tashkil etilgan yangi diplomatik organ — «Tinchlik kengashi»ning birinchi yig‘ilishida ma’lum bo‘ldi. Rejaga ko‘ra, dunyo futbol afsonalari yoshlarni ruhlantirish va mintaqaning gumanitar ehtiyojlariga e’tibor qaratish maqsadida diplomatik missiya bilan G‘azoga tashrif buyurishadi. Ushbu tashriflar nafaqat futbol madaniyatini tiklashga, balki mahalliy aholining turmush sharoitini yaxshilashga ham xizmat qilishi kutilmoqda.