25 oktyabr kuni Tbilisida «Ivanishvilisiz Gruziya» shiori ostida hukmron «Gruziya orzusi» partiyasi siyosatiga qarshi ommaviy namoyish bo‘lib o‘tdi. Muxolifat va fuqarolik jamiyati vakillari tashkil etgan yurishda minglab odamlar qatnashdi.

«Markaziy Osiyo» nashrining «Doyche Velle» va «Kavkaz tuguni» ma’lumotlariga tayanib xabar berishicha, namoyishchilar Tbilisi davlat universitetidan Rustaveli xiyoboni tomon yurish qilgan. Ular Gruziya, Ukraina va Yevropa Ittifoqi bayroqlarini ko‘tarib chiqqan.

«O‘zgarishlar uchun koalisiya» yetakchisi Nika Gvaramiya namoyishlarni norozilik harakatining yangi bosqichi deb atadi. Muxolifat 28 noyabr kuni yirik miting o‘tkazishni rejalashtirmoqda.

Noroziliklarga muxolifat partiyalarini taqiqlash ehtimoli va mamlakatning Yevropa Ittifoqiga integrasiyasi bilan bog‘liq vaziyat sabab bo‘lmoqda.

Gruziyada ommaviy namoyishlar 2024 yil bahorida «xorijiy agentlar» to‘g‘risidagi qonun qabul qilinishi ortidan boshlangan. Hukumatning Yevropa Ittifoqiga qo‘shilish bo‘yicha muzokaralarni 2028 yilgacha kechiktirish to‘g‘risidagi qarori esa noroziliklarni yanada kuchaytirgan.