Germaniyada har oy 5000 dan ortiq ukrainalik ish topmoqda, ammo...

Germaniyada har oy 5000 dan ortiq ukrainalik ish topmoqda, ammo qariyb yarim million kishi nafaqa olmoqda.

Ukrainada keng ko‘lamli urush boshlanganidan to‘rt yarim yil o‘tib, qariyb 400 ming nafar Ukraina fuqarosi Germaniyada ish topgan. Ularning deyarli 350 ming nafari majburiy ijtimoiy ajratmalar to‘lanadigan ish o‘rinlarida mehnat qilmoqda. Germaniya Federal mehnat agentligi (BA) ma’lumotlariga ko‘ra, 2026 yil iyun oyiga kelib ukrainaliklarning bandlik darajasi 39,7 foizga yetgan.

Shu bilan birga, bazaviy ijtimoiy nafaqa olayotgan ukrainaliklar soni yuqori darajada qolmoqda — qariyb 474,5 ming kishi. Faqat qisman band bo‘lganlarni hisobga olmaganda, bandlik darajasi 34,4 foizga tushadi.

«Germaniya uchun muqobil» (AfD) partiyasidan Bundestag deputati Rene Shpringer hukumatning ukrainalik qochqinlarni ish bilan ta’minlashni tezlashtirishga qaratilgan Job-Turbo dasturi muvaffaqiyatsizlikka uchraganini bildirdi. U hokimiyatning deputat so‘roviga bergan javobidan kelib chiqib, ukrainaliklarning bandlik darajasi aslida yanada past — 27,1 foizni tashkil etishini aytdi, deb xabar berdi dpa. Shpringerning ta’kidlashicha, u urushdan oldin Germaniyada ishlagan Ukraina fuqarolarini statistikadan chiqarib tashlagan.

Federal mehnat agentligida esa bunday hisob-kitoblar amalga oshirilmasligini ma’lum qilishdi, chunki statistikada mamlakatga kirib kelish sanasi hisobga olinmaydi.

BA ta’kidlashicha, Germaniyada ishlayotgan ukrainaliklar soni o‘rtacha har oyda 5000 nafardan ortiqqa ko‘paymoqda. So‘nggi bir yilda ularning soni 64 ming nafarga oshgan. Shu bilan birga, nafaqa oluvchilar soni taxminan 19 ming kishiga kamaygan.

Federal mehnat agentligi, shuningdek, ukrainaliklarning Germaniya mehnat bozoriga integrasiyalashuvi avvalroq kelgan qochqinlar guruhlariga nisbatan sezilarli darajada tezroq kechayotganini qayd etdi.