Fransiyada namoyishlar boshlanganidan beri qariyb 8 ming kishi qo‘lga olindi

Fransiyada maktab o‘quvchilarining namoyishlari boshlanganidan buyon 7 950 kishi qo‘lga olindi. Ularning 85 foizini voyaga yetmaganlar tashkil etadi. Bu haqda BFMTV telekanali mamlakat Adliya vazirligi ma’lumotlariga tayanib xabar berdi.

Ma’lumotlarga ko‘ra, 13 oktyabr soat 17:00 holatiga 1 177 nafar voyaga yetgan va 6 773 nafar voyaga yetmagan shaxs qo‘lga olingan. Ularning 26 nafari sudga qadar qamoqqa olingan bo‘lib, 65 foizi voyaga yetganlardir.

Jami 2 735 nafar shaxsga nisbatan jinoiy ish qo‘zg‘atilgan. Yana 2 225 kishiga nisbatan muqobil huquqiy choralar qo‘llanilgan. Ular orasida sinov muddati bilan ogohlantirish, yetkazilgan zararni qoplash majburiyati va muayyan joylarga borishni taqiqlash kabi choralar bor. Shuningdek, 1 263 ta ish ko‘rib chiqilmasdan tugatilgan.

BFMTV ta’kidlashicha, taqqoslash uchun, «Sariq nimchalilar» harakatining birinchi oyida Fransiyada 4 ming kishi qo‘lga olingan edi.

Fransuz maktablarining yuqori sinf o‘quvchilari bir necha haftadan beri dars jadvalining haddan tashqari zichligi, o‘qituvchilar yetishmasligi va ta’lim tizimidagi boshqa muammolarga qarshi namoyishlar o‘tkazmoqda. Ayrim aksiyalar tartibsizliklar bilan kechgan.

13 oktyabr kuni Parijdagi ommaviy namoyishda polisiya ishtirokchilarni tarqatish uchun ko‘zdan yosh oqizuvchi gaz va suv purkagichlardan foydalangan. 6 oktyabrdagi aksiya davomida ham polisiya ko‘zdan yosh oqizuvchi gaz va shovqinli granatalarni qo‘llagan.