Fransiya hukumati iste’foga chiqdi

Fransiya Milliy Assambleyasi bosh vazir Mishel Barniyer boshchiligidagi hukumatga ishonchsizlik votumini ma’qulladi. 331 deputat zarur 288 ovoz bilan vazirlar mahkamasi iste’fosi uchun ovoz berdi, bu uning hukumatini Beshinchi Respublika tarixidagi eng qisqa hukumatga aylantirdi.

Uch oylik bosh vazirlikdan so‘ng Barniyer prezident Emmanuel Makronga o‘z iste’fosini taqdim etishi kerak. Siyosiy inqiroz hukumatning maxsus konstitusiyaviy vakolatlardan foydalangan holda, parlamentni chetlab o‘tib, budjetni qabul qilishga urinishi tufayli yanada kuchaydi.

Ovoz berishdan oldin so‘zga chiqqan Barniyer taklif etilgan budjetning kamchiliklarini tan oldi. «Biz haqiqat va mas’uliyat momentiga yetib keldik. Men budjet loyihasi mukammal bo‘lmaganini tan olaman – biz boshidanoq hammasini to‘g‘ri bajara olmadik», — dedi bosh vazir.

Fransiya endi chuqur siyosiy noaniqlik davriga duch kelmoqda. Reuters xabariga ko‘ra, Makron tezda yangi bosh vazirni tayinlash niyatida, yaxshisi shanba kuni AQShning saylangan prezidenti Donald Tramp ishtirok etishi kutilayotgan Notr-Dam soborining ochilish marosimi oldidan.

Fransiyadagi siyosiy inqiroz Germaniyada hukmron koalisiyaning yemirilishi bilan yuzma-yuz turgan Yevropa Ittifoqining pozisiyasini zaiflashtirishi mumkin. Vaziyat moliya bozorlarida jiddiy xavotir uyg‘otmoqda: birinchi marta Fransiya davlat obligasiyalari bo‘yicha foiz stavkalari Gresiyadan oshib ketdi, bu Fransiya iqtisodiyoti uchun misli ko‘rilmagan hisoblanadi.