Farg‘ona Neftni qayta ishlash zavodi hududida chaqaloq yerga ko‘mib ketilgani aniqlandi

Joriy yilning 28 noyabr kuni soat 10:25 larda Farg‘ona shahar IIB navbatchilik qismining bergan xabariga ko‘ra, Farg‘ona shahar, “Qirguli” MFYda joylashgan Farg‘ona neftni qayta ishlash zavodi(FNQZ) hududida joylashgan 12-sonli ishlab chiqarish sexining yer maydoniga taxminan 3-6 oylik bo‘lgan homila ko‘mib ketilganligi aniqlangan. Bu haqda Bosh prokuratura UzNews.uz'ga xabar qildi.

Mazkur holat yuzasidan hodisa sodir bo‘lgan joyga shahar prokurori rahbarligidagi tezkor-tergov guruhi chiqib, hodisa joyi va o‘lik homila ko‘zdan kechirilgan hamda voqea joyi, ya’ni homila ko‘mib ketilgan yerdan qonga o‘xshash dog‘lar ashyoviy dalil tariqasida olingan.

Aniqlanishicha, shu yilning 28 noyabr kuni soat 10:00 larda FNQZ hududining 12-sexning avtomobil to‘xtash joyidagi yer maydonida daydi it tomonidan yerni kovlab olishi natijasida homilani aniqlab, yerning ustiga chiqarib qo‘yganligini ko‘rib qolgan sex ishchilari tegishli tartibda bu haqda xabar berishgan.

FNQZ hududidan topilgan o‘lik homilaning o‘limi sababi va tan jarohatlarini aniqlash uchun o‘tkazilgan sud-tibbiy ekspertizasining dastlabki ma’lumotnomasida, “ona qornidagi o‘lik homila, homila ichi infeksiyasi, homila ichi gipoksiyasi, o‘g‘il bola jinsiga mansub 3-4 oylik homila ekanligi” qayd etilgan.

O‘lik homilaning genetik materiallari haqidagi ma’lumotlarini olish va saqlash, bazadagi mavjud genetik materiallar bilan solishtirib, uning ota-onasini aniqlash uchun odamning genetik materiallari sud-biologik ekspertizasi tayinlangan.

Hozirda o‘lik homilaning onasini topish bo‘yicha surishtiruv ishlari olib borilmoqda.

Shuningdek, abort yoki homilani sun’iy tushirishdan keyin tibbiy yordamga murojaat qilgan ayollar hamda FNQZ xodimlarini aniqlash maqsadida viloyat Sog‘liqni saqlash boshqarmasi va shahar IIBga alohida topshiriqlar yuborilgan.

Mazkur holat yuzasidan Farg‘ona shahar prokuraturasi tomonidan tergovga qadar tekshiruv harakatlari olib borilmoqda, tekshiruv ustidan nazorat o‘rnatilgan.