Evropada yil boshidan buyon qariyb 650 ming gektar o‘rmon yonib ketdi

2026 yil boshidan buyon Yevropada o‘rmon yong‘inlari qariyb 648 ming gektar hududni yo‘q qildi. Bu haqda Yevropa Ittifoqining Qo‘shma tadqiqot markazi ma’lumotlari xabar bermoqda. Bu ko‘rsatkich o‘tgan yilning shu davridagidan kam — o‘shanda qariyb 995 ming gektar maydon yong‘indan zarar ko‘rgan edi. Shunga qaramay, Janubiy Yevropaning ko‘plab mamlakatlarida yong‘inlar maydoni so‘nggi yigirma yillik o‘rtacha ko‘rsatkichdan ancha yuqori.

Eng ko‘p zarar Ispaniyaga yetgan: u yerda 295 ming gektardan ortiq hudud yong‘in oqibatida yo‘q qilingan. Fransiyada qariyb 96,5 ming gektar maydon yonib ketgan, holbuki o‘rtacha ko‘rsatkich 14,8 ming gektarni tashkil etadi. Italiyada esa deyarli 105 ming gektar hudud zarar ko‘rgan, o‘rtacha ko‘rsatkich esa qariyb 57 ming gektar. Shu bilan birga, Portugaliya va Gresiyada yong‘inlar tufayli zarar ko‘rgan hudud maydoni ko‘p yillik o‘rtacha ko‘rsatkichdan past bo‘lgan.

Tadqiqotchilar og‘ir yong‘in mavsumini erta boshlangan jazirama issiq to‘lqinlari va kuchli qurg‘oqchilik bilan bog‘lamoqda. Yana bir omil nam qish mavsumi bo‘lgan: u o‘t-o‘lan va boshqa o‘simliklarning tez ko‘payishiga sabab bo‘lgan, yozda esa bu o‘simliklar qurib, yong‘in uchun yonilg‘iga aylangan.

Shu bilan birga, yong‘inlarning bevosita sababchisi aksariyat hollarda odamlar bo‘lib qolmoqda — ehtiyotsizlik yoki ataylab o‘t qo‘yish natijasida.