Eron AQSh talablariga javob berdi: uran boyitish to‘xtatilmaydi

Al Alam xabariga ko‘ra, Eron uranni to‘liq boyitishni to‘xtatmaydi va mavjud zaxiralarni eksport qilmaydi. Bu haqda telekanal yuqori martabali eronlik manbaga tayanib ma’lum qilgan.

Shu bilan birga, Al Jazeera manbalariga ko‘ra, Tehron AQSh bilan muzokaralar davomida uranni boyitishni vaqtincha to‘xtatib turishni taklif etgan.

“Taklifimizda boyitishga bo‘lgan suveren huquqimiz alohida ta’kidlangan. Shu bilan birga, cheklangan muddatga boyitishni vaqtincha to‘xtatib turish imkoni ko‘rib chiqilgan”, — deya telekanal manbaning so‘zlarini keltiradi.

Shu tariqa, Eron tomoni uran boyitishdan butunlay voz kechmasligini, ammo muayyan shartlar asosida vaqtinchalik cheklovlarni muhokama qilishga tayyorligini bildirgan.