Bugun, 2026 yil 24 aprel kuni jinoyat ishlari bo‘yicha Farg‘ona viloyati sudida Namangan shahrining sobiq hokimi Anvarjon Otaxo‘jayev ustidan sud jarayoni boshlanadi.
U 60 ming AQSh dollari miqdorida pora olishda ham ayblanmoqda.
Dastlab ish Namangan viloyati hududida ko‘rib chiqilishi rejalashtirilgan edi. Biroq himoya tomoni sudning xolisligi va adolatli ko‘rilishi ta’minlanishi nuqtai nazaridan hududiylikka raddiya bildirib, ishni boshqa hududga o‘tkazishni so‘ragan. Natijada ish jinoyat ishlari bo‘yicha O‘zbekiston tumani sudiga o‘tkazildi.
Anvarjon Otaxo‘jayev 2025 yil 2 sentyabr kuni pora olishda gumon qilinib, Namangan shahar hokimligi kanselariya bo‘limi xodimining ko‘rsatmalari asosida hibsga olingan.
Biroq himoya taraf bu holatga jiddiy e’tiroz bildirmoqda. Ularning ta’kidlashicha, amaliyot o‘tkazilgan vaqtda hokim shaharning boshqa qismida xizmat uchrashuvida bo‘lgan.
Ishning eng bahsli nuqtalaridan biri shuki, 60 ming AQSh dollarini berishda ishtirok etgan shaxsga oid holatdir. Ma’lum bo‘lishicha, mazkur “jabrlanuvchi” Namangan viloyatida huquqni muhofaza qiluvchi organlar bilan hamkorlikda kamida 16 ta jinoyat ishida shu maqomda ishtirok etgan.
Himoya tomoni bu holatni alohida o‘rganmoqda va uning boshqa hududlarda ham shunday amaliyotlarda qatnashgan-qatnashmaganini tekshirmoqda.
Ushbu ish nafaqat muayyan shaxs taqdiri, balki tergov amaliyoti, “jabrlanuvchi” institutidan foydalanish amaliyoti va sud jarayonining haqiqiy xolisligi kabi muhim masalalarni yana bir bor kun tartibiga olib chiqmoqda.
Eng asosiy savol esa ochiq qolmoqda: bu ishda haqiqat qay darajada to‘liq va xolis aniqlanadi?
Tehron Eron kemasini qo‘lga olganidan keyin AQSh harbiy kemalariga hujum qildi
Eron Isroil bilan aloqa qilganligi uchun yuqori lavozimli amaldorni qatl qildi
“Katta jarimalar bo‘ladi”: Soliq qo‘mitasi raisi umumiy ovqatlanish korxonalarini biznesni bo‘lmaslikka chaqirdi
