CNN: AQSh Kuba chegaralari yaqinida razvedka faoliyatini keskin kuchaytirdi

AQSh Kuba qirg‘oqlari yaqinida razvedka parvozlari sonini keskin oshirdi, deb yozadi CNN aviasiya ma’lumotlari tahliliga tayanib.

«4 fevraldan beri AQSh Harbiy-dengiz va Harbiy-havo kuchlari uchuvchisiz va boshqariladigan samolyotlardan foydalangan holda kamida 25 ta shunday missiyani amalga oshirdi. Parvozlarning aksariyati mamlakatning ikki yirik shahri — Gavana va Santyago-de-Kuba yaqinida sodir bo‘lgan», — deyiladi nashr xabarida.

Telekanal ma’lumotlariga ko‘ra, parvozlarning asosiy qismi kuzatuv va razvedka uchun mo‘ljallangan P-8A Poseidon dengiz patrul samolyotlari tomonidan bajarilgan.

Shuningdek, radiotexnik razvedkaga ixtisoslashgan RC-135V Rivet Joint samolyotlaridan ham foydalanilgan. Bundan tashqari, bir nechta yuqori balandlikda harakatlanuvchi MQ-4C Triton razvedka dronlari ham jarayonga jalb etilgan.